مصر , دوله اراضيها ف قارتين الشرق ف شمال افريقيا و الغرب ف غرب اسيا,اهلها بيتكلموا مصرى , دينها الرسمي الاسلام (الإسم الرسمى للدولة الحالية هو جمهورية مصر العربية من سنة 1971, اسامى الدولة قبل كده كان من ضمنها السلطنة المصرية و المملكة المصرية و الجمهورية المصرية و الجمهورية العربية المتحدة, فيه بيطالبو بالرجوع لإسم الجمهورية المصرية أو جمهورية مصر).
مصر بلد موجوده فى شمال شرق قارة أفريقيا, بيحدها من الشمال البحر المتوسط و من الشرق البحر الأحمر مساحة مصر حوالى مليون كيلومتر مربع. مصر دوله أفريقيه بس فيه حته من أراضيها, اللى هى شبه جزيرة سينا, فى قارة اسيا فعشان كده مصر بتعتبر دولة عابرة للقارات.
مصر ليها حدود من الغرب مع ليبيا و من الجنوب مع السودان و من الشمال الشرقى مع إسرائيل و قطاع غزه, و البحر الأحمر بيفصلها عن الأردن و السعوديه, و قناة السويس اللى بتفصل جزءها اللى فى اسيا عن اللى فى أفريقيا.
من الوجهه الجغرافيه الطبيعيه من العصور الفرعونيه لغاية النهارده بتنقسم الأراضى المصريه لقسمين رئيسيين : الوجه البحرى اللى بيمتد فى شمال القاهره على شكل مروحه و بينهى حده البحرى عند البحر المتوسط و بيتسمى مصر السفلى. و الوجه القبلى اللى بيمتدعلى ضفتين النيل من جنوب القاهره لغاية حدود مصر الجنوبيه و بيتسمى مصر العليا أو الصعيد.
مصر عدد سكانها من أكبر تعدادات سكان الدول فى أفريقيا, و حسب اخر التقديرات, عدد سكان مصر عدا ال96 مليون انسان (90 مليون جوه مصر و الباقى بره), و ترتيبها الخمستاشار على مستوى العالم من أصل 242 دولة من حيث عدد السكان, بيعيش اغلبهم على ضفاف النيل اللى مساحة الوادى بتاعه حوالى 40,000 كيلو متر مربع. الصحرا بتشكل أغلب مساحتها و هى مش معموره. معظم السكان فى مصر (حوالى نصهم) دلوقتى من الحضر بيعيشو فى مدن, ربعهم فى مدينة القاهره, أكبر مدينه فى افريقيا و الشرق الأوسط و كمان فيه نسبه كبيره فى مدينة اسكندريه و فى الدلتا. مصر ليها شهره عالميه بسبب تاريخها من أيام الحضاره المصريه القديمه اللى سابوا لمصر و للعالم اروع الاثار زى اهرامات الجيزه و ابو الهول و معبد الكرنك و وادى الملوك فى مدينة الاقصر. مصر كمان ليها دور مهم جداً فى الشرق الأوسط و خصوصا على المستوى الثقافى و السياسى.